Te Kupu Taurangi Auahatanga Kāwanatanga
Putanga 0.9, 30 Whiringa-a-nuku 2017

Dave Moskovitz rāua ko Brenda Wallace

1. Kei ngā wāhi katoa ngā kaiauaha kāwanatanga
   1. Ehara i te mea me ahu mai te auahatanga i roto anō o te kāwanatanga – e whai wāhi ana ngā kirirarau noa, ngā pakihi, ngā whakahaere rāngai hapori me ētahi atu ki te whakapai ake i te kāwanatanga.
   2. Ka taea e te katoa te auaha.
   3. Kaua noa tātou e whiwhi whakaaetanga ki te auaha.
   4. Ehara i tētahi tangata anake tēnei mea te auahatanga kāwanatanga,
   5. Ka whai hua tātou katoa mā te tiritiri noa me te ngākau tuwhera.
   6. He mahi auau, rerekē hoki te whakaahu whakamua, ā, me ukauka tonu te whakapau kaha kia tutuki ai.
2. Ko tā te auahatanga he whakapai ake i tō tātou hapori
   1. Hei kaiauaha kāwanatanga e mahi ana tātou mō te iwi whānui, he rite tonu tā tātou rapu ara hei whakapai ake i te oranga o te iwi whānui.
   2. He ao hihiri te ao e noho nei tātou. Nā te panoni haere tonu o tō tātou ao, o te hangarau anō hoki, kia kaua tātou e tatari noa. Mā aua panoni ka hua ake he whai wāhitanga me ngā mōreatanga, engari i ētahi wā he tōtōā te kore mahi i tētahi mahi.
   3. Ko tā ngā kaiauaha kāwanatanga he kimi huarahi kia pai ake, māmā ake, ngāwari ake, tere ake, tōkeke ake, mārama ake, wātea ake, whaihua ake, ngahau ake ngā mahi tauwhitiwhiti kāwanatanga.
   4. Ka whiwhi hua te katoa i ngā mahi auaha kāwanatanga papai, me te takatika o te pānga o ēnei ki ngā mea e tino kaingākautia ana e tātou.
   5. Me noho tonu te aroha hei uho mō ā tātou mahi katoa. Ko te tangata, ahakoa ko wai, te mea nui.
3. He mahi ā-rōpū te auahatanga
   1. Ko tā tātou he paheko me te mahi tahi.
   2. Mā pango mā whero ka oti te mahi. Me whai wāhi ki ā tātou mahi ko ērā kāore e rite ana ki a ngāi tātou.
   3. Me whakarite kia whai wāhi mai ērā tāngata ka āta pāngia e ā tātou mahi, ina koa te hapori e mahi ai tātou.
   4. He nui ake te whakarongo i te kōrero, kāore tātou e whakawāwā, he whakaute tonu.
   5. E mohio ana tātou ki ō tātou anō uara me te pānga o ēnei ki tō tātou tirohanga.
   6. E ahu mai ana ā tātou whakatau mā ngā raraunga me ngā whakamātautau.
   7. He hāngai, he whakahoahoa ā tātou whakawhitiwhiti kōrero.
   8. Mā ā tātou mahi e āhei ētahi atu te eke panuku.
   9. Ko tā tātou he whai me te whakawhānui i ngā rangahau me ngā mahi a te hunga tōmua.
   10. Ka tono i te arotake ā-aropā ina hāngai.
   11. Ka āhukahuka i te tangata, i te mahi rānei ina hāngai.
   12. E mahi ana tātou whakawhiti i ngā marau, tari kāwanatanga, rāngai me ngā mana whakahaere, kāore e taratahi ana ā mātou mahi.
   13. Hui katoa, he hapori tātou. Me tautokotoko, me taupuhipuhi tātou i a tātou.
4. Arā kē he ture
   1. Ko te tikanga, he pūtake mō ngā ture.
   2. Kāore tātou e whati i ngā ture[1], whakaritenga rānei.
   3. E ngana ana mātou ki te mahi i roto i ngā kaupapahere e mana ana i tēnei wā, ā, i ngā wāhi e hapa ai ngā kaupapahere, ka whakapau kaha ki te panoni i runga i te whaihua.
   4. Ehara tēnei kīnga, “Mai rā anō e pēnei ana te mahi”, i te ture. He ritenga anake tēnā. Ka taea ngā ritenga te takahi.
   5. Ina kitea he ture ka takahi i te putanga ka whakaarohia, ka mahi i runga i te whaihua ki te panoni.
5. He mōrearea te auahatanga
   1. Ko te iho o te auahatanga ko te uru atu ki tērā kāore i te mōhiotia, me te whakaae ki te tūpono mōrearea.
   2. Ka mahi tonu ētahi mea, kāore ētahi atu e mahi. Mēnā ka eke pānuku te katoa o ā tātou mahi, tērā tonu pea kāore i te rawaka tā tātou whakapau kaha. Me mōhio āhea me hohota, āhea me kaurori, āhea hoki me maunu.
   3. I ētahi wā he angitu kē te mūhore. E kore tātou e moumou whai wāhitanga ki te whiwhi akoranga i ngā whakamātauranga kīhai i whakaputa i ngā putanga i tūmanakohia. E tiritiri noa ana tātou i ō tātou akoranga. Ka taea e te rōpū whai ake te whiwhi mōhiotanga nunui i ēnei, ā, mā reira e whakaheke ai i te mōrea whānui ki te pūnaha.
   4. Ko te mea korokē, ko te tikanga he nui ake te mōrea ka puta i te whakakore mōreatanga. Ka puta pea i ngā toanga wā poto ngā ruihi wā roa, nā reira me whakataurite i ngā mōreatanga ki ngā whai wāhitanga, ngā utu me ngā painga.
   5. Ko te mea nui me whai kiko te whakahaere mōreatanga. Me whakarite kia hāngai ngā utu o te whakamauru ki te mōreatanga.
6. He uaua te auaha
   1. Ko te taunoa, whakawhēuaua ai “Te Pūnaha”, ā, tohetohe ai i te mahi rerekē.
   2. He takatika, he whaihua ā tātou mahi, me te kawe i hunga kē i te ara e whāia ana. E kitea ana pea te whiwhi rawa hei panoni i te pūnaha tē hiahia ki te panoni hei mahi tokoreko. Me āta whakarite tātou kia mōhio te tangata ki ngā pūtake o tā tātou e mahi ana, me ngā painga ka puta mai.
   3. Me taruna ehara ngā ariā i te taketake, ā, kua whakatinanahia kētia i mua. Ka ako i te maha ka taea i ngā mahi tōmua.
   4. Ka hōnene pea te para i ngā haurahi hou, te whakaae ki ngā mōrea, me te uruhi tāngata kia mahi i ngā mahi e tahangoi ai rātou ko te whakapai ake i tō tātou kāwanatanga, pāpori hoki te pūtake. E tono tautoko ana i mua, ka takatū ki te whakapuaki i ngā painga ka puta i ā tātou mahi
   5. Me taruna ka mahi te tangata i runga i te ngākau pono. Ka tautokotoko tētahi i tētahi, ahakoa kāore e whakaae ki ngā taipitopito. He tika te pūtake o ā tātou mahi auaha, te whakapai ake i tō tātou pāpori. E manaaki ana tātou i a tātou.
   6. Kia māhorahoa mai, kia māhorahora atu. Ka puta i te māhorahora he huringa pai ka whakamāmā ake i te auahatanga me te whakahou. He iti te matakahi, pakaru rikiriki te tōtara.
   7. Kāore tātou e ngana ki te whakamāmā ake i ā tātou mahi, te whakaiti rānei i ngā utunga mā te wharanga ki ētahi atu. E whakaaro tonu ana ki ngā mutunga iho o ngā mahi kāwanatanga – ina koa ki te kawenga tautuku me ētahi atu hua kino ka puta i ā tatou mahi. Ko tā tātou, he whakatau, he whakatika, he whakaheke raruraru, ehara i te mea he nuku i te raruraru ki wāhi kē.
7. He kaipanoni tātou. Ka mahi i runga i te mōhio, me te whai i te rerekētanga takatika i ngā wā katoa.

He mea ahu mai te tuhinga nei i ngā pūtake maha, tae atu ki te Agile Manifesto, te Lean Startup Methodology, me ētahi atu, i te taha o te atamai i akona mai i ngā mātua tūpuna. Ka kitea te pono mā te whakapakari i ngā kitenga o ētahi o mua.

 

Mēnā ka hiahia ki te urupare, tuku tākupu, huatau rānei mō ngā huringa, tēnā mahia i te putanga Google Docs.

Ka whakahaeretia he awheawhe ki Te Whanganui-a-Tara ā te 7 o Hakihea 2017 i te 5pm (Whakautu mai) hei matapaki i ngā whakapainga me ngā whakahāngaitanga o tēnei Kupu Taurangi.

Kua tukuna te Kupu Auaha Kāwanatanga i raro i tētahi raihana Tautohu Matatiki 4.0 ā-Ao. Ka āhei te tiritiri noa me te tautohu matatiki ki a Dave Moskovitz rāua ko Brenda Wallace mā te tohu ki https://leanpolicy.org/manifesto/ – Ngā mihi!

 

 

[1] Whai whakaarohia ēnei i te horopaki o Aotearoa: Bill of Rights Act, Human Rights Act, Privacy Act, Official Information Act, Te Tiriti o Waitangi … arā ētahi atu e tauwhāiti ana ki tō rohe mahi. Karawhiua atu.